Talebe Miras Picu Kriminalitas

MIRAS pada umumnya salalu jadi pemicu timbulnya kriminalitas.(Foto: ist)

Manado, MR – Banya persoalan kriminalitas yang terjadi di Kota Manado lantaran orang so talebe minum miras (minuman keras,red). Padahal, cuma persoalan kacili mar tiba-tiba jadi basar depe laste di kantor polisi. Oleh karna itu, masyarakat minta supaya peredaran miras di Kota Manado musti lebe diawasi. Karna biar undang-undang atou aturan so ada, mar kalo ndak ada pengawasan sama deng nyanda jo.

“Peristiwa kriminal yang terjadi rata-rata lantaran pelaku so melep alias talebe ba miras. Padahal, kalo ja kontrol itu emosi nyanda akan mo jadi panjang, ujung-ujungnya ada yang maso rumah saki ada yang di kantor polisi,”kata Christy Naomi Rey, orang Paal Dua, Jumat (17/03).

Menurut cewek cantik tersebut, kalo pemerentah deng aparat keamanan salalu lakukan pengawasan pasti peredaran miras di masyarakat boleh mo dapa kontrol. Mar samua itu tergantung masyarakat sendiri. Kalo so tau miras bisa jadi pemicu kriminalitas jangan ja jual itu barang begitu. Atou laeng kali di acara-acara pesta kong pake musik, sering kali ada miras yang ikut melengkapi.

“Samua tergantung masyarakat, biar pemerentah deng aparat keamanan so awasi, mar kalo masyarakat yang kase ruang peredaran miras ya sama deng nyanda jo. Ini katu perlu peranan torang samua,”kata nona Christy.(stephen)

Tinggalkan Balasan

Alamat email Anda tidak akan dipublikasikan. Ruas yang wajib ditandai *