Walikota Vicky Kase Inga Kalo Om Micler Birokrat Lama

ADA kata-kata yang menarik pa Walikota Manado DR Ir GS Vicky Lumentut SH MSi DEA pe sambutan, waktu acara pelantikan om Micler CS Lakat SH MH jadi Sekretaris Daerah (Sekda) Kota Manado definitif, hari Jumat (26/10).

Walikota Vicky kase inga pa pejabat-pejabat di Pemerintah Kota (Pemkot) Manado, kalo om Micler bukan birokrat kalamaring. Karna om Micler so lama di Pemkot Manado. Jadi dorang pe lenggang kata, om Micler so tau mo arah kemana.

“Kita tau, Saudara Micler Lakat bukan baru kalamaring di Pemkot Manado. Beliau adalah pejabat yang so lama di Manado. Jadi, ngoni pe lenggang dia so tau. Ibaratnya, ngoni baru mo pegang gitar, Micler so tau ngoni mo manyanyi apa,”kata Walikota Vicky.

Olehnya, om Vicky pesan supaya pejabat-pejabat di Pemkot Manado musti baku bantu deng om Micler. Sama deng dorang ada dukung pa om Bartje Assa, Penjabat Sekda lama, begitu juga dorang pe dukungan for om Micler.

“Mainkan gitar itu deng harmonis for torang wujudkan visi deng misi Kota Manado,”pesan Walikota Vicky.

Om Micler Lakat diangkat jadi Sekda Manado, ada ganti pa om Barje yang depe nama lengkap Peter KB Assa ST MSc PhD. Kong yang lantik Walikota Vicky Lumentut, ada hadir ley Wakil Walikota Mor Bastiaan SE deng pejabat-pejabat laeng di Pemkot Manado.(janto)